خطة رجوع

موضوع: خطة رجوع الجمعة أكتوبر 23, 2009 6:14 am

السلام عليكم ورحمة الله وبركاته
أنا كاتبة الموضوع ده لنفسي أولا ولكل تايه في الدنيا ،لكل قلب مؤمن بيحب ربه ،لكل قلب بعد عن الله ومشتاق لكل لحظة حلوة في كنف الله ،عايزين نلاقي مع بعض حل للفتور الايماني ،عايزين نقول لربنا اننا لما بنبعد عنك يا حبيبنا الدنيا بتبقي صعبة اووووووووووي ،عايزين مع بعض نعمل خطة رجوع لله عز وجل ،عايزين نفوق من الغفلة ،عايزين نكون مسلمين بحق ،عايزين قلوبنا تنطق قبل لسانا وتقول بحبك يارب.
تيجوا نبتدي مع بعض الخطة ، تيجوا نعلي الهمة ونقرب من ربنا من تاني ، تيجوا نشيل الغفلة اللي ملت قلوبنا ونستبدلها بأعظم حب في الوجود حب الله ....
وأول خطوة في خطتنا حناخدها من كلام حبيبنا وقدوتنا ومعلمنا الرسول الكريم (جددوا ايمانكم بلا اله الا الله فان الايمان يبلي كما يبلي الثوب)صدقت يا سيدي يا حبيبي يا رسول الله
لا اله الا الله ما اعمقها من كلمة فعلا لو نطقتها بقلبك حتحس بيها وبمعناها ،كلمة لو فضلنا نتكلم عنها مش حتكفينا مجلدات عشان نتكلم عن اسرارها، يلا انطقها ساكت ليه يلا املا قلبك بلا اله الا الله ولو قلبك لسة مش حاسس استني اوعي تقول مفيش فايدة انطق بلسانك وقلبك اكيييييييييييييد حيحس بيها ،خلي عندك ثقة في الله انه مش حيسيبك ،طاب شوف كدة الحديث القدسي اللي الله عز وجل بيقول فيه(من تقرب الي شبرا تقربت اليه ذراعا ومن تقرب الي ذراعا تقربت اليه باعا ومن اتاني يمشي اتيته هرولة) صدق الله العظيم
الله علي الكلام اللي بيقوله الله الودود اللي بيتودد لعباده رغم بعدهم وتقصيرهم ،بس احنا نبتدي وناخد الخطوة وربنا مش حيسبنا ابدا، عايزين نوري ربنا من انفسنا خيرا ....
الخطوة اللي بعد كدة القران اوعي ما يكونش ليك ورد يومي ،اوعي تقطع طريق بيجيلك فيه رسايل من حبيبك
عايزين نحافظ علي ورد يومي للقران مش عايزين ابدا نكون هاجرين للقران ،عايزين قلوبنا تكون عامرة بالقران.....
الصدقة يا جماعة باب كبير للدخول علي الله يلا روح هات محفظتك وطلع صدقة وخد نية لله وقول يارب الصدقة دي عشانك عشان بحبك عشان عايزك بيها تقربني منك ومتنساش ان الله طيب لا يقبل الا طيب....
خطوة من الخطوات المهمة في خطتنا هي قيام الليل تقدر تصلي ركعتين قيام ويا حبذا لو كانوا في التلت الاخير يااااااااااااااااااااااه بجد اجمل احساس لما تقف بين ايدين حبيبك وانت كدة مسلم امرك ليه والله احساس بقمة السعادة لما تصلي بالليل ،والله مهما كنت بعييييييييييييد حتحس بالقرب لما تحافظ علي قيام الليل....
نيجي لخطوة بردو مهمة جدااااااااااااااااااااااااااااا في طريقك لله وهي بر الوالدين ،انت ابوك وامك راضيين عنك ولا لا؟طاب عارف ان رضاهم من رضا ربنا عنك ،طاب انت مزعلهم في حاجة ،اوعي تنام وهما زعلانين منك خاف علي نفسك ،خاف من غضب ربنا ،ايه رأيك تروح تبوس ايديهم وتقول يارب انا بعمل كدة ابتغاء لرضاك حرضي اهلي عشان تبقي راضي عني وما تنساش ان ربنا في كتابه الحكيم قرن برك لوالديك بعبادته سبحانه وتعالي(وقضي ربك الا تعبدوا الا اياه وبالوالدين احسانا ) صدق الله العظيم
طاب تيجوا نقول اهم حاجة واللي بجد من غيرها مش حتعرف تعمل حاجة من اللي قلنا عليها وهي الصحبة الصالحة، يا اخواني ويا اخواتي الصحبة الصالحة هي العمود الفقري للثبات
قال الله تعالي في كتابه الحكيم (واصبر نفسك مع الذين يدعون ربهم بالغداة والعشي يريدون وجهه ولا تعد عيناك عنهم تريد زينة الحياة الدنيا ولا تطع من اغفلنا قلبه عن ذكرنا واتبع هواه وكان امره فرطا)صدق الله العظيم
ممكن الخص كلامي في كلمتين انا عايزة ارجع لربنا ،عايزة اقوله ملييش غيرك يا حبيبي ،عايزة اذل نفسي وافضل ادعي وابكي واعيش بحبه ،عايزة احس برضاه عني ،عايزة اقرب من تاني عايزة اجدد ايماني،عايزة افوق من غفلتي، وعايزاكوا تشاركوا معايا في خطة رجوعي لله ،يلا نفتح قلوبنا لحب الله ،يلا شدوا الهمة معايا وياريت مننساش الدعاء بالثبات (اللهم يا مقلب القلوب والابصار ثبت قلوبنا علي دينك)....
اعتذر للاطالة والسلام عليكم ورحمة الله وبركاته....

موضوع: رد: خطة رجوع الجمعة أكتوبر 23, 2009 10:25 am

بارك الله فيكى اسماء كلام جميل ومجهود رائع نفعنا الله واياكى يارب جميله المشاركه بجد ياريت الكل يقراها ويستفيد

موضوع: رد: خطة رجوع الأحد أكتوبر 25, 2009 12:37 pm

بارك الله فيكي اختي علي تلك الكلمات الرائعه
والحمد لله الذي جعلنا مسلمين