ياتري ربنا اصطفاك قبل كدة ولا لأ؟؟؟ادخل وانت تعرف

بسم الله الرحمن الرحيم
(رب اشرح لي صدري ويسر لي أمري وأحلل عقدة من لساني يفقهوا قولي)

صدق الله العظيم
ورد في الأثر أن الله تعالي أوحي إلي داوود عليه السلام قال له (ياداوود لو يعلم المدبرون عني شوقي لعودتهم ورغبتي في توبتهم لذابوا شوقا إلي، يادوود هذه رغبتي في المدبرين عني فكيف محبتي للمقبلين علي)

الله علي الكلام، واخدين بالنا من كلمة (فكيف محبتي للمقبلين علي)، شوفوا ربنا بيحب عبيده أد ايه حتي المدبرين عنه وبعيد عن طاعته، وشوفوا كمان المقارنة الجميلة اللي في الكلام اللي بين المدبرين والمقبلين، يعني شوفوا شوق ربنا أد إيه للمدبرين انهم يرجعوا لطريقه وده يخلينا نستشعر من كل قلوبنا مدي حب ربنا لينا واحنا مقبلين عليه وعلي طاعته.

من هنا أوصل معاكم للموضوع اللي عايزة أتكلم معاكم فيه، الموضوع هو نعمة من أكبر النعم اللي ربنا من علينا بيها (نعمة القرب من الله عز وجل)

والله ما أجملها من نعمة كان السبب فيها اصطفاء من ربنا لينا، أيوا والله احنا ما قربنا من ربنا بشطارتنا أبدا والله اللي احنا فيه ما هو الا اصطفاء، اصطفاء يوم ما اختارنا نتولد مسلمين من أمة حبيبه محمد صلوات ربي وسلامه عليه، هو احنا عارفين لو كنا اتولدنا غير مسلمين كان ايه ممكن يكون حالنا، أي ضلال كان ممكن نعيشه لو ما كناش مسلمين، قلوبنا كانت حتكون عاملة ازاي لو ما كناش مسلمين، ياتري اخرتنا كانت حتكون ايه لو ما كناش مسلمين، ياااااااااااااااااااااه شايفين مجرد اصطفاء واحد بس هو إنك تتولد مسلم حاسين هو أد إيه نعمة كبيرة .

طاب يلا كدة من كل قلوبنا نقول مع بعض الحمد لله علي نعمة الاسلام وكفي بها نعمة ...

طاب بعد ما اتولدنا مسلمين، تفتكروا خلصت الاصطفاءات علي كدة، مش كان ممكن نعيش مسلمين عصاة ومنعرفش غير طريق المعصية ومالناش دعوة بطريق الطاعة وطريق ربنا ونبقي مسلمين في شهادة الميلاد بس زي للأسف حال كتير من المسلمين دلوقتي (ربنا يهدينا جميعا الي صراطه المستقيم)
ومش لازم عصاة كان ممكن نكون مسلمين غافلين لا لينا في المعصية ولا حتي في الطاعة وده كمان حال كتير من المسلمين لولا ان ربنا شرح صدورنا للاسلام بس مش الاسلام اللي بالاسم مش عشان اسمه محمد ولا احمد في شهادة الميلاد يبقي مسلم وخلاص لا الاسلام الفعلي اللي هو اتعلم ديني واطبقه في كل حياتي .

ومن هنا اوصل معاكم لاصطفاء تاني من رب الارباب لينا وهو حب الايمان
قال الله تعالي (ولكن الله حبب اليكم الايمان وزينه في قلوبكم وكره اليكم الكفر والفسوق والعصيان) صدق الله العظيم .
طاب بصوا وشوفوا الاصطفاء الكبير الملازم لحبنا للايمان وهو انه شرح صدورنا للاسلام وانا حسيب ايات ربنا تتكلم عن النقطة دي
قال الله تعالي(أفمن شرح الله صدره للاسلام فهو علي نور من ربه فويل للقاسية قلوبهم من ذكر الله أولئك في ضلال مبين ، الله نزل أحسن الحديث كتابا مثاني تقشعر منه جلود الذين يخشون ربهم ثم تلين جلودهم وقلوبهم إلي ذكر الله ذلك هدي الله يهدي به من يشاء ومن يضلل الله فماله من هاد)صدق الله العظيم
صدقت يارب العالمين ، الله علي الكلام والله انا الايات دي بتأثر فيا جداااااااااا (أفمن يشرح الله صدره للاسلام فهو علي نور من ربه)
ياااااااااااه مجرد انه يصطفينا ويشرح صدورنا للاسلام نبقي علي نور من مين يا جماعة من رب العالمين يعني نبقي علي هدي منه يعني نحب اللي يحبه ونكره اللي يكرهه يعني نبقي مش بنفكر غير في رضاه يعني حياتنا كلها تتحول من عادات لعبادات ، يا اخواني ويا اخواتي احنا كان ممكن نكون مسلمين وقلوبنا قاسية ، عارفين يعني ايه اجسامنا تقشعر من ذكر الله عارفين يعني ايه قلوبنا تتحرك لما نسمع كلام عن ربنا ، طبعا كلنا بتمر علينا اوقات قلوبنا بتقسي فيها شوية وبنبقي مضايقين اوي ونفسنا الشعور ده ينتهي وترجع قلوبنا ترق من تاني لذكر الله، حتي الشعور ده مين اللي حاطه في قلوبنا ، ياجماعة الله هو اللي سمحلنا نقرب منه ونحبه هو اللي حط في قلوبنا شعور اننا مش قادرين قلوبنا تبعد لحظة عنه.
طاب اقروا معايا بقلوبكم الاية اللي جاية دي قال الله تعالي(فمن يرد الله ان يهديه يشرح صدره للاسلام ومن يرد ان يضله يجعل صدره ضيقا حرجا كأنما يصعد في السماء كذلك يجعل الرجس علي الذين لا يؤمنون) صدق الله العلي العظيم
احنا واخدين بالنا ان ربنا في كل ايه حاططلنا الصنفين ، عارفين كدة الانسان اللي قلبه منشرح تبص في وشه تحس انه مالك الدنيا وما فيها وكأنه مفيش ولا هم علي قلبه مع ان مفيش حد فينا خالي من الهموم للأننا في دار الابتلاءات لكن في فرق في استقبال القلوب لمحن وهموم الدنيا بين انسان قلبه منشرح للايمان وللاسلام وبين واحد مش ماشي في طريق ربنا بتحسه انه مش طايق الدنيا باللي فيها وبتحس ده علي وشه سبحان الله زي ما ربنا بيقول (يجعل صدره ضيقا حرجا كأنما يصعد في السماء)

بجد لازم كلمة الحمد لله تطلع من أعماق قلوبنا علي النعمة العظيمة اللي احنا فيها علي نعمة انه سمحلنا نقربله وسمحلنا نتكلم عنه، نعمة انه اصطفانا من عباده المؤمنين ، نعمة انه رزقنا بصحبة صالحة تعينا علي طاعته.

والله يا جماعة الاصطفائات ما بتخلصش وكل واحد فينا أدري بتفاصيل حياته حنبص حنلاقي حب ربنا اللي مغرقنا واصطفائاته لينا واللي هي اكبر دليل علي حبه لينا.
في اصطفاء تاني هو ان يخلي نفسك الامارة بالسوء تتحول لنفس لوامة ، النفس اللوامة دي تدفعك للتوبة والرجوع والانابة لطريق ربنا .

في اصطفاء جميييييييييييل جداااااااااااااا وانا عن نفسي لما بحس بيه ببقي مستشعرة رضا ربنا عني في اللحظة اللي بحس فيها الاحساس ده بالرغم انه حاجة مؤلمة جدا

الاحساس ده هو احساس الغربة ، عمر حد فيكم حس انه غريب والله زي ما قلتلكم انه احساس مؤلم جدا انك تحس انك غريب عن الدنيا كلها ، ممكن احساس الغربة ده يجيلنا في شغلنا لما نبقي حابين نقول كلمة حق وكل اللي حوالينا مش بيقولوا غير الباطل
ممكن تحسه في الشارع لما تلاقي معاكاسات الشباب للبنات وتلاقي البنات اللي لابسة حجاب أي كلام لما نلاقي الاغاني محوطانا من كل ناحية شايفين اد ايه الاحساس ده مؤلم فعلا الواحد بيبقي غريب ولوحده والامثلة كتيييييييييير اوووووووي بس ييجي حبيبنا رسولنا الكريم صلي الله عليه وسلم ويقول (جاء الاسلام غريبا وسيعود غريبا فطوبي للغرباء) الله حاسين بالكلام فطوبي للغرباء يبقي دلوقتي نتمني اننا نكون من الغرباء

في حاجة كدة خطرت علي بالي بمناسبة الكلام عن احساس الغربة هو احنا لما بنشوف حد بيعصي ربنا وبنشوف كل الحجات الوحشة اللي محوطانا بنضايق ليه؟؟؟؟
طاب ثانية واحدة كدة افكركم بالحديث ده قال الرسول(ان الله يغار وغيرة الله ان ياتي المرء ما حرم الله)
تصدقوا حاجة جميلة جدا لما تأتي بفعل من أفعال الله، يعني احنا مضايقين ان في حد مزعل حبيبنا الله
طبعا ما هو اللي بيحب حد ما بيحبش يزعله وكمان ما بيحبش أي حد يزعله ، بجد والله يوم ما تزعل لما تشوف حد بيعصي ربنا ده دليل علي حبك ليه جل وعلا وده يخلينا نحس اكتر بنعمة قربنا منه اللي من علينا بيها.

حختم كلامي بحيث قدسي عن ابي هريرة رضي الله عنه قال: قال رسول الله صلي الله عليه وسلم
(قال الله تعالي: من عادي لي وليا فقد آذنته بالحرب وما تقرب الي عبدي بشئ احب الي مما افترضته عليه ولا يزال عبدي يتقرب الي بالنوافل حتي احبه فإذا أحببته كنت سمعه الذي يسمع به وبصره الذي يبصر به ورجله التي يمشي بها ويده التي يمشي بها ولئن سألني لأعطينه ولئن إستعاذاني لأعيذنه)

الله علي كلام ربنا لينا، ربنا لو حبنا حيبقي سمعنا اللي بنسمع بيه وبصرنا اللي بنشوف بيه ورجلينا اللي بنمشي بيها وايدينا اللي بنبطش بيها ، عارفين الكلام ده نحسه امتي؟نحسه لما نبقي سامعين كلام يغضب ربنا ومش طايقين نسمعه ولا لما ييجي منظر كدة ادام عينينا واحنا عارفين ان دي حاجة ما ترضيش ربنا ونلاقي نفسنا بندور وشنا بعيد عشان مش قادرين نبص علي حاجة ربنا مش راضي عنها، ياجماعة مين اللي خلا ودانا ما تسمعش الا اللي يرضيه مين اللي خلا عينينا ما تستحملش تشوف حاجة تغضبه مين اللي خلا ايدينا مش عايزة تعمل حاجة حرام مين اللي خلا رجلينا بتحب تمشي لكل مكان فيه حاجة ترضي رب العالمين والله بعلو صوتي حقلها مش بشطارتنا ده كرم وفضل ونعمة من الله سبحانه وتعالي ...يااااااااااااااااارب قربنا منك كمان وكمان لأن حياتنا في البعد عنك مالهاش أي لزمة ولا أي طعم، يااااااااارب مش عايزين نعيش الا برضاك فارضي اللهم عنا ووفقنا لعمل كل مايرضيك عنا..
اللهم يا مقلب القلوب والابصار ثبت قلوبنا علي دينك
أسأل الله لي ولكم الاخلاص في القول والعمل وربنا يجعلنا ممن يستمعون القول فيتبعون أحسنه
والسلام عليكم ورحمة الله وبركاته

اللهم اهدنا بفضلك فيمن هديت وتولنا فيمن توليت وقنا اللهم واصرف عنا شر ما قضيت
تسلمى يا اسماء والله موضووع كتير جميل ربنا يبارك فيكى وينفع كل الناس بعلمك
ويارب الناس تصحى وتقرا وترد وتبطل نوم بقى
السلام عليكم

» هو احنا ليه مش بنشوف ربنا؟؟؟؟؟؟؟؟؟
» هل حقا تعرف نفسك ؟
» صور نادرة ادخل و شوف
» لعبة جامدة موت كلنا عيلة واحدة فى اللعبة دي ادخل وشوف اخواتك
» بتحب رسول الله اوى ادخل وسيب صفة او اى حاجة تعرفها عنة وخلينا نجمع صفاتة ونعرفها