وحشني أوووووووي....ووحشتني أيامه!!!

السلام عليكم ورحمة الله وبركاته
إخواني وأخواتي أبدأ حديثي معكم بسم الله، أنا حابة أنقلكم مشاعري عن حد عزيز وغالي جدااااااااا علي قلبي وبجد بجد وحشني أووووي ووحشتني أيامه، أنا عارفة إنه غالي علي كل واحد فيكم انتوا كمان وتتمنوا لو يكون موجود بينكم عمركم كله .

عرفتوا أنا بتكلم عن مين؟؟؟؟؟؟؟

بتكلم عن ضيف غالي بنفضل شهور ندعي ربنا يبلغهولنا وبنفضل شهور من بعده ندعي ربنا يقبله منا .

أكيد كدة عرفتوا أنا بتكلم عن مين، أيوا صح زي ما كلكم بتقولوا دلوقتي أنا بتكلم عن رمضان اللي حبيبنا رسول الله صلي الله عليه وسلم قال عليه (لو علمتم ما في رمضان لتمنيتم أن تكون السنة كلها رمضان)

ارجعوا معايا كدة بقلوبكم، افتكرتوا رمضان؟ طاب حسيتوا بالشوق لأيامه؟حسيتوا بالحنين لحضن رمضان؟
فاكرين يومنا كان عامل ازاي؟يومنا كان متقسم ما بين شغل وصيام وصلاة وقرآن ودعاء وعبادة
يومنا كله كان لله لا لأحد سواه
طاب فاكرين قصة الحب الجميلة اللي عيشناها مع حبيبنا المصطفي عليه أفضل الصلاة وأتم التسليم من رب العالمين، فاكرين المساجد اللي كانت مليانة بالمصلين، فاكرين وحدة المسلمين في صلاة التراويح، أيوا وحدة المسلمين ما إنت يوم ما تصلي ورجلك في رجل أخوك اللي ما تعرفهوش وكل اللي بيجمعكوا لااله الا الله محمد رسول الله يبقي احنا كدة في وحدة وما أحلاها من وحدة واحنا بنتجمع علي الله اكبر(يارب نتوحد عليها يوم ما تترد لينا كل بقعة مسلمة مغتصبة)
الله علي الجو الجميل اللي بنعيشه في رمضان، طاب احنا فين دلوقتي من رمضان؟ياتري لسة عايشين فيه ولا رجعنا تهنا في الدنيا من تاني، مين فينا بيفتكر يدعي اللهم اقبل منا رمضان ؟؟؟

رمضان فعلا خلص من شهرين، بس قلوبنا ما ينفعش تنسي، قلوبنا ما ينفعش تنسي عشرتها مع حبيبها الله،دي العشرة مش بتهون مع البشر فمابالكم بالعشرة مع رب الأرباب.
الله علي تنافسنا في الخير في رمضان (وفي ذلك فليتنافس المتنافسون) صدق الله العظيم
الله علي كل لحظة جميلة عيشناها في كنف الله، الله علي ذلنا بين ايدين ربنا واحنا بنبكي وندعي بخشوع وطمعانين في عفوه وعتقه لينا من النار.
تاني حسألكم وأسأل نفسي احنا فين من ده كله؟ احنا فين من رمضان؟ احنا فين من روحانيات رمضان؟ ليه ما نخليش أيامنا كلها رمضان وما ننساش اننا مش بنعبد رمضان احنا بنعبد رب رمضان اللي معانا في كل لحظة في حياتنا، اللي أقرب لينا من نفسنا، اللي بيسمع نجوانا وشكوانا،اللي بيهدي قلوبنا للي بيحبه، اللي بيكرمنا أعظم الكرم مع إننا ما نستاهلش كرمه اللي مغرقنا لكن هو بيدينا بما هو أهل له فهو الله أهل التقوي وأهل المغفرة،هو حبيبنا اللي يوم ما بيبتلينا بيبتلينا عشان بيحبنا عشان يكفر ذنوبنا ويقربنا للجنة اللي أعددها لينا بنفسه جل وعلا.

عرفتوا احنا ليه بنشتاق لرمضان، احنا بنشتاق لرمضان عشان بنحب ربنا وبنحب أوي نكون قريبين منه،
احنا قلوبنا فطرتها اللي اتفطرت عليها بتحب ربنا وبتحب لحظات الطاعة وبتكره لحظات المعصية، ممكن يكون في شوية تراب علي قلوبنا بس بمشيئة ربنا حنشيل التراب ده مع بعض، يلا نعين بعض ونجدد عهدنا مع الله وأنا بستغل الفرصة دي وأنا بتكلم عن رمضان وأيامه الجميلة إن أفكركم بأيام غالية أوي داخلين عليها أيام ذو الحجة (أيام الحج العظيمة)

ناويين علي إيه السنة دي؟ إيه رأيكوا تيجوا نحج من غير ما نحج، يمكن كتير مننا ربنا لسة ما كتبلوش يوصل للبيت الحرام والكعبة المشرفة وأنا عارفة ان كلنا قلوبنا بتتقطع ونفسنا نكون هناك، طاب تعالوا نتعاهد مع بعض ونحج بقلوبنا السنة دي، تعالوا نرجع ذكرياتنا الجميلة مع ربنا، تعالوا نرجع ذكريات رمضان اللي قلوبنا مشتاقة ليها حق الاشتياق، طاب احنا مشتاقين لإيه من رمضان، طبعا أول حاجة بنفتكرها من رمضان هي الصيام، تيجوا نصوم مع بعض التسع الاوائل من ذي الحجة وناخد نية كبيرة ولتكن نصرة أمتنا، تيجوا نصوم مع بعض بالنية دي، وطبعا طبعا كلنا عارفين يعني ايه صيام يوم عرفة يعني ذنوب سنة فاتت وسنة جاية حيتغفروا بإذن الله (ايه كل الكرم ده يارب).
يبقي كدة احنا اتفقنا مع بعض عالصيام، طاب نفتكر ايه تاني من ذكريات رمضان الجميلة (القرآن) عايزين تجديد عهد بالقرآن عايزين همة عالية وقلوب مفتوحة لكلام ربنا عايزين اللي هجر القرآن يستغفر ربنا ويقول مش حسيب قلبي تاني من غير ما أعمره بالقرآن.
وما ننساش حديث حبيبنا المصطفي صلوات ربي وسلامه عليه (ما من أيام أعظم ولا أحب إلي الله العمل فيهن من هذه الأيام العشر فأكثروا فيهن من التهليل والتكبير والتحميد) صدق حبيبي المصطفي عليه الصلاة والسلام
نطلع من الكلام ده بإيه، نطلع منه بإننا حنجتهد في كل عمل يرضي ربنا وحنكتر من ذكر الله وحندعي كتييييييييييييير وحنطلب من ربنا يرقق قلوبنا ويهدينا لكل شئ يرضيه وما ننساش كمان ان (أفضل الدعاء دعاء يوم عرفة)
طلب اخير فاكرين قيام رمضان والتراويح، مشتاقين للتهجد ولحظاته الجميلة؟ يلا نجدد عهدنا مع ربنا في قيام الليل، يلا نعيش أحلي مناجاة مع رب العالمين.

أعتذر جدا للإطالة لكن الخلاصة من كلامي يلا نجدد عهدنا مع الله في كل مايرضي الله، يلا نخلي أيام السنة كلها رمضان، يلا نحج بقلوبنا لحد ما ربنا يكتبلنا زيارة بيته الحرام، يلا نعيش مع ربنا بجد، يلا كل واحد فينا يقول لربنا من كل قلبه
بحبك يارب.
وخير ختام دعاء حبيبي المصطفي (اللهم إني أسألك حبك وحب من يحبك وحب كل عمل يقربني لحبك)
والسلام عليكم ورحمة الله وبركاته

السلام عليكم ورحمة الله
اللهم انا نسالك صحبه حبيبك فى الجنه شكرا اسماء ربنا يوفقك يارب